September 2026.
In Springbok neem 135 Graad 12-leerders konkrete stappe na hul toekoms toe. ‘n Paar leerders het reeds terugvoer ontvang oor hul aansoeke vir universiteite, kolleges en beurse – werklike vordering wat moontlik gemaak is deur ‘n loopbaanvoorligtingsprogram. Hierdie program help leerders om die aansoekproses te navigeer en ingeligte besluite te neem oor hul opsies vir verdere studie en toekomstige loopbane.
“Die ondersteuning wat ons ontvang het, het werklik ‘n verskil vir ons as Graad 12-leerders gemaak. Ons is aangemoedig om verdere studie te oorweeg en daar is vir ons gewys dat daar geleenthede en ‘n toekoms vir ons voorlê. Die span was vriendelik, toeganklik en altyd bereid om te help. Hulle het werklik deure vir ons oopgemaak, en ons is baie dankbaar vir die ondersteuning en die geleentheid,” het Chelsea Swartz, adjunkhoofmeisie van St Anna Sekondêre Privaatskool, gesê.
Agter hierdie vordering staan ’n toegewyde span van agt plaaslike vroue wat direk met leerders werk om hulle deur die aansoekproses te lei. Die span bestaan uit twee verteenwoordigers van Khaus Development, drie voormalige internstudente van die Kangnas-windkragaanleg en drie studente – ‘n kombinasie van ervaring en praktiese insig wat leerders help om deurgaans ondersteun te voel.
Aangesien die sessies na skoolure plaasvind, word middagete voorsien aan beide die leerders en die vroue wat die program fasiliteer.
“Toegang tot loopbaanvoorligting en ondersteuning met aansoeke kan die verskil beteken tussen ‘n leerder wat sy of haar opvoeding voortsit en een wat dit nie doen nie. Ons wil verseker dat geen jong persoon in ons gemeenskap daardie geleentheid misloop bloot omdat hulle nie geweet het waar om te begin nie,” het Rouchet Daniels, Ekonomiese Ontwikkelingsbestuurder by Kangnas-windkragaanleg, die program se finansierders, gesê.
Leerders van drie skole het reeds bystand ontvang, insluitend agt leerders van Hoërskool Nababeep, vyf van Hoërskool Concordia en twee van Hoërskool Namaqualand. Verdere sessies word by St Anna Sekondêre Privaatskool en Hoërskool Okiep beplan, waar leerders ook ondersteuning sal ontvang met aansoeke vir universiteite, kolleges en beurse.