September 2025.

Dertien jong gegradueerdes van Springbok bou hul toekoms deur die Wind Industry Internship Programme. Die program, wat deur die Kangnas-windkragaanleg en die Energy and Water Sector Education and Training Authority (EWSETA) ondersteun word, gee plaaslike jeug die kans om praktiese ervaring in die hernubare energiesektor op te doen. Deur opleiding en blootstelling aan die werkplek aan te bied, help die inisiatief hierdie jongmense om voor te berei vir blywende loopbane terwyl dit verseker dat die gemeenskap direk by die windkragaanleg baat.

WIIP, wat in Januarie 2022 van stapel gestuur is, is ontwerp om die gaping tussen akademiese leer en werklike bedryfservaring te oorbrug. By die Kangnas-windkragaanleg kry interns blootstelling aan die daaglikse bedrywighede van ‘n windplaas op nutsskaal, waar hulle saam met die operasionele span werk.

“Die program speel ‘n belangrike rol in die aanspreek van Suid-Afrika se jeugwerkloosheidskrisis. Benewens die aanbied van praktiese werkservaring, bied dit finansiële ondersteuning aan jong gegradueerdes, wat hindernisse soos vervoer- en professionele kleredragkoste verwyder, terwyl dit hulle ‘n werklike kans gee om volhoubare loopbane te bou,” het Rouchet Daniels, Ekonomiese Ontwikkelingsbestuurder vir Kangnas-windkragaanleg, verduidelik.

Die groep, gekies deur die South African Wind Energy Association (SAWEA) en afkomstig uit diverse professionele en akademiese velde soos maatskaplike werk, bemarking, ingenieurswese, menslike hulpbronne en administrasie, is gekies vir hul sterk akademiese prestasie, leierseienskappe en gedeelde toewyding om tot die hernubare energiebedryf by te dra.

Om hul sukses te verseker, word elke intern gekoppel aan ‘n toegewyde mentor wat leiding en professionele ondersteuning bied dwarsdeur hul plasing. Om hulle verder voor te berei vir die werkplek, neem interns ook deel aan ‘n 10-dae Werkgereedheidsprogram, wat hulle toerus met noodsaaklike vaardighede soos rekenaargeletterdheid, kommunikasie en professionele etiket.

“Ek is verheug en dankbaar dat ek vir hierdie internskap gekies is. Dis ‘n droom om tot volhoubare energie by te dra terwyl ek my elektriese ingenieursvaardighede by ‘n windplaas toepas. Hierdie geleentheid is die eerste stap in die rigting van my doelwit om ‘n ingenieur te word en ‘n loopbaan te bou wat help verseker dat hernubare energie betroubaar en doeltreffend aan die netwerk gelewer word,” het Ronaldo Saal, 2025 WIIP-intern by Kangnas-windkragaanleg, gesê.

Die program het reeds sy sukses gedemonstreer deur vorige deelnemers, soos Tyrique Engelbrecht, nou Operasionele Aanleg-intern, en Chanique Cloete, wat gevorder het tot ‘n 10-maande-rol as ‘n Ekonomiese Ontwikkelingsprojekbeampte-intern. Hul stories toon die program se vermoë om loopbane vir in die hernubare energiesektor te skep.